第324天-10個月20日*粥粥再見了..

Otto大個仔啦, 佢依家吾要食粥粥啦!! 要食飯-3- 前排見佢吾肯食粥仔, 我鬼死咁緊張.. 初初以為係佢出緊第2隻牙仔所以無胃口, 點知後尾有日我姑姐黎俾炒飯佢食, 佢食得鬼死咁雀躍!! 今日我的起心肝整左d爛飯仔俾佢食, 真係要好"傑"好"傑", 但係仲要見到成粒米形架喎!! 佢食左成碗咁滯牙.. 真係好西利 :) 見到咁樣我好開心.. 覺得佢真係大個仔左.. 之前d肉1定要用攪拌機攪爛晒架.. 但係今日都吾洗爛晒.. 我整左西蘭花瘦肉爛飯.. 佢食得勁開心!! 係咁叫我俾佢食添.. 聽日我要再努力試下Otto仔係咪要食爛飯仔先得!!

尋日我地返左第2堂Playgroup牙, 其實應該係第3堂架啦!! 因為我地第2堂吾記得左去牙-3- 學左陣爬..之後又學探索.. 我發覺呢d playgroup吾係好岩阿仔玩, 我決定玩完呢個下次參加baby gym果d啦!! 聽人講好似多d野玩又玩得興奮d.. 岩晒阿仔咁爛玩牙 xdd

好快新年啦.. 仲未買到唐裝衫俾Otto仔牙!!! 又吾想買咁貴.. 因為好似想得個1,2日好晒咁-3-下年又1定吾會岩著架啦.. 好煩牙好煩牙.. 如果呢個星期都簡吾岩我就去吉之島買啦!!

第319天*10個月15日-終於回復從前了..

1切終於都回復正常啦!! 之前有1排真係心情好低落, 吾知係咪真係因為無每月1次影響到心情.. 定還是真係已經累積左好多心事係內心.. 記得自己以前真係好大情大性架.. 有咩開心吾開心都1定會表露晒出黎.. 要喊就喊.. 自從同老公結左婚再加上生左仔仔之後, 每次喊都係偷偷地喊.. 因為吾想老公擔心, 吾想老公難做, 吾想加重老公既壓力.. 最重要吾想影響到仔仔既情緒, 但係呢1次真係再忍吾住啦!! 因為重重既原因覺得條路好難行, 明明係2個人行既路變到得返自己1個行.. 仲要受好多好多不必要既氣, 有時真係好嬲.. 點解自己連仔仔少少既野自己都決定吾到.. 就算明明真係已經好堅決咁決定左.. 最後都要就某人而改變!! 好高興老公會支持我.. 同時間亦到好嬲自己帶俾老公咁多麻煩.. 到依家呢1刻, 我仍然吾願意去接觸老公既媽媽同爸爸!! 因為大家之間既思想諗法好似差好遠咁.. 而且每1次見到佢地既時候我仲係會覺得仔仔會俾人搶走咁.. 有時會諗係咪自己真係太緊張仔仔, 但係問心其實我都吾算啦!! 只係因為佢地曾經真係令仔仔出事過.. 而且仲要出事前我已經警告過, 當出事後我第1個反應係好嬲我自己, 點解我做吾到媽媽應該做既野, 因為我連自己個小朋友都保護吾到.. 不過我終於無事啦!! 因為老公開始肯改左佢D壞習慣.. 希望呢1切都可以維持喇 =]

回復正常之間第1件事梗係要去參加返D BB聚會啦, 我已經斷左2個星期無參加啦!! 當然吾止係我自己心情吾好啦, 仲因為仔仔之前1路都病下好下咁.. 依家佢好返啦!! 雖然仲有好多痰.. 但係最起碼無鼻水了.. 之前有鼻水真係吾敢帶佢出去見其他BB朋友仔, 因為廢事轉染到人麻!! BB病左就係做媽媽最擔心架啦 =] 呢次去左清水灣8號晴晴屋企.. 有好多個0903既BB去牙.. 成10個咁多..仲有1個哥哥仔添 =] 嘻.. 佢好錫住D BB, 我相信佢1定係1個好哥哥黎架!! 玩得好開心, 不過我發現仔仔好似吾係咁鍾意同其他BB玩, 等佢大D我要TRAIN下佢先得.. 今次玩完仲落左大家樂同兩個媽媽傾左陣心事.. 佢地好好人, 係咁開解我, 多謝你地牙!! 我發現你地真係無歧視過我係1個年輕媽媽, 相反仲對我勁好, 好到好似當係我妹妹咁!! 我真係好感動牙.. 同你地傾完我鬆左好多牙..

第309天-10個月5日*第1堂Playgroup

第309天-10個月5日*第1堂Playgroup

阿仔今日第1日返Playgroup, 尋晚仲凌晨2點先訓-3-衰豬黎架!! 不過估吾到今朝佢自己11點可以起到身囉, 吾係我叫佢架!! 飲完奶換左3我地就出去啦.. 第1堂教SAY HELLO同汁玩具.. 阿仔玩玩下就已經扭眼訓了.. 好彩最後都捱到落堂者!! 我同老公都好ENJOY個Playgroup牙.. 希望下堂熙熙既狀態會好d啦.. 阿仔終於都收晒d鼻水啦.. 今日係我見吾到鼻水小姐既1日 xddd 很高興.. 但係咳先生同痰姨姨都吾肯走牙.. 我要諗辦法趕走佢地吾好煩住阿仔至得啦..

阿仔依家成日玩掛床果個音樂轉轉轉牙, 仲要係咁扯佢落黎.. 阿仔吾可以咁暴力架!!! 呢期成日教阿仔拍手同拜拜, 但係佢都未學識-3- 我地要再繼續努力牙..

第305天-10個月1天

"突然又已1年" XDD 話咁快就到2010年啦, 踏入2010年我竟然差吾多成個星期無update個BLOG啦!! 皆因我沉迷左玩FB個Cafe World牙.. 玩完之後仲令我玩返N年前玩既夢幻西餐廳2添-3-講完我講返阿仔先, 吾知做咩事佢學識左自己除褲牙 XDD 晚晚訓著覺都自己除左褲仲要"呼"晒被, 攪到佢個衰豬又凍襯啦!! 係咁流鼻水, 仲要2次藥食, 如果咁都吾好既就要再睇1次醫生啦!! 有1晚無聊得滯幫阿仔紮左條辮變左阿囡 XDD 哈哈.. 見到阿囡我開心死.. 因為真係好想生個女女架!! 不過依家都仲未係時候為我地再添1個家庭成員.. 因為阿仔已經變得好扭計啦.. 成日要人抱.. 扭眼訓果時仲1定要我抱添.. 你話點算? 阿仔未好得返晒, 攪到我都吾敢出街.. 每日淨係對住部電腦, 其實生活都幾苦悶.. 不過見到阿仔真係大個左好多個感覺好奇妙 :) 果日老公講過埋年阿仔差吾多1歲啦.. 光陰似箭, 真係估吾到咁快.. 由知道有左阿仔, 跟住吾知點算好旁惶, 到決定要生BB, 結婚, 蜜月旅行, 老公讀書, 個肚愈黎愈大, 生仔, 老公失業, 到依家我地1家3口終於都有D曙光, 所發生既野都仲好似係尋日既事咁, 08下半年開始到依家我真係感受良多.. 個人都好似大個左好多諗野成熟左好多咁.. 希望未來既日子都會過得順順利利, 快快樂樂!!

本身真係想打過09年既回顧, 不過當想打既時候發現其實都無咩特別野.. 黎來黎去都係阿仔點點點, 阿仔咁咁咁.. 其他既都應該係D自己仲未習慣未適應甚至乎吾想去改變既吾開心野!! 相信呢1年最令我值得記住既只係生左阿仔, 同埋因為生仔而識到既1大班朋友!! 好開心有D咩吾開心呢1班朋友會支持我鼓勵我.. 未來我都會好珍惜你地每1個架!! 至於D吾開心既野吾想自己特別去記住, 期望我心入面都吾會記住啦 xdd 不過就難d囉!! 哈哈..